من انتم؟؟؟ للشاعر محمد الفاخري

من انتم؟؟
نحنا هم نحنا...يا فاضحنا ...صبح اسود يوم فيك اصبحنا

نحنا مشنقتك
في سردابك عند التكتك
نحنا اللي جبنا خاتمتك
يلي ما كلمة ماسكتك
قدام العالم فاضحنا
من جدك تنشد من نحنا؟؟

نحنا هم ياسك
نحنا اللي ودرنا راسك
نحنا السم اللي في كاسك
نحنا اليوم خلاص حواسك
يلي ما في يوم اربحنا
منك مانك عارف نحنا

نحنا هم ليلك
نحنا اللي قصينا ذيلك
نحنا التابوت اللي ايشيلك
نحنا اللي سقناه رحيلك
بكلابك انتا وعويلك
نحنا الياس اللي يوميلك
في نومك ديما شابحنا
يا ظالم ما تعرف نحنا؟؟

نحنا اتسونامي
نحنا سيل ايجي متعامي
يكنس في اكلابك قدامي
نحنا هو الجمر اللي حامي
اللي اتهددبا هاضك نحنا

نحنا خاتمتك
نحنا شكيما شاكمتك
نحنا الضربة اللي قاسمتك
نحنا هم قاضي محكمتك
يا مجرم ما تعرف نحنا؟؟

نحنا هم سيدك
نحنا اللي شلينا ايدك
نحنا قتالين عبيدك
خوخمناك انتا ووليدك
يا طاغي ما تعرف نحنا؟؟

نحنا هي الامة
نحنا ليدين الملتمة
دارت ثوب ووفت كمه
نحنا هي الحيطة اللي صمة
يا كارس واتريد القمة
من جدك ما تعرف نحنا!!؟؟

نحنا الملوك
اللي خلوك
عليهم تنشد يا صعلوك
انتا من امك من هو بوك؟؟
من عمك وين ضنا خوك؟
احكي صارحنا يلي تنشد فينا نحنا؟؟