طرابلس الأسيرة

يشغل حالك
تحرر الشرق انشالله عقبالك
يا طرابلس بالحيل

يا محتلة
لك وعد منى واخذه من الله
ايجيك وقت بيدك ضلمتك تجلى
والشمس تطلع من جديد اقبالك
تعيشى عزيزه موش عيشة ذله
وتعلى زغاريتك على استقلالك
اوتزهى بعد طولة عناء او مذله
ويبقى معمر فى عذابه هالك

يا مغصوبه
عليك كل وان دموعنا مسكوبه
ما من صغير سن ناشئ دوبه
اكسى بالكفن من قبل مايوعالك
وما من فتاة فى عقلها ميدوبه
ادنس شرفها حالها كى حالك
تفنن معمر حط عنف اسلوبه
دار مذبحه ذبح جميع اعيالك

يا العليله
ف الهول والقهاير لك سنين طويله
انت العروس الباهيه الجميله
وانت المناره الزاهيه برجالك
انت طيحتك للذل مستحيله
انت فخرنا والفخر فى نضالك
انت معمر خوف خليتيله
ع الله تفكى ف الزمان اقفالك

للشاعر نعيم الزوى